Rawt Malan Masat Nhtoi Byin Wa Ai Lam

Kachin National History, Rawt Malan Laban


       Jinghpaw Wunpawng amyu sha ni gaw, No. 2 Mungkan majan ngut ai hpang, Myen, Sam, Hkang ni hte Sam Mung Panglung Mare kaw, ga sadi laika langai rau jawm galaw la sai. Dai ga sadi laika hta hkan nna, rap ra ai mungmasa ahkaw ahkang kata kaw, rau nga ga ngu ai masa lam yan hta Myen, Sam, Hkang hte Jinghpaw ni madung ningpawt ninghpang da nna, Myen Mung kaw rau jawm nga na matu galaw ai. Dai ga sadi laika hta hkan nna Jinghpaw ni gaw , Myen, Sam, Hkang ni hte shanglawt jawm la sai. Munghpawm Myen Mung hpe rau jawm de la sai. 

    Dai zawn rai Myen ni hte shanglawt rau jawm la ai hpang, myen amyu bawsang ni gaw, lahta kaw tsun lai wa sai hte maren, Panglung ga sadi n dung ai. 1947 ning hta galaw ai mungdan tara kanu hpe shatup ai lam n galaw ai. Jinghpaw amyu bawsang ni lu ra ai ahkaw ahkang ni hpe, n jaw ai. Mung masa ahkaw ahkang lam yan shagu hta  mung Jinghpaw ni hpe rap ra ai ahkaw ahkang n jaw ai. Shanhte ra ai hku kam ai hku chyinglau galaw sha wa ma ai re.

         Dai majaw Jinghpaw amyu sha ni gaw, ndai mung masa lam yan hpe sharai na matu saboi ntsa kaw n-gup aga hte tsun jahkrup yu ai lam hta n mai byin ai lam nga wa ai hpe mu lu ai. Dai majaw Jinghpaw ningbaw nkau mi kaw nna, Jinghpaw Mungdan shanglawt lu ra ai ngu ai myit masa ni bai pru wa ai. 

    Dai zawn re ai myit masa hta hkan nna, Yangon mare kaba, Yankin dakkasu kaw lung nga ai Jinghpaw dakkasu jawngma marai sanit gaw... 

1. Mali Zup Zau Mai

2. Lahtaw Zau Tu

3. Pungshwe Zau Seng

4. Stiven Malang Shawng

5. Hkangda Brang Gam

6. Hpauyu Tu Lum

7. Nahpaw Gun Jawng 

ni gaw Jinghpaw Mungdan Shanglawt Hpung hpe hpaw la nna rawt malang hpang na matu galaw wa ai. Dai Wuhpung hpe Jinghpaw Mungdan shanglawt hpung(KIO) ngu shamying sai.. Ndai hpu shawng hpu ba marai sanit hpe Seven Stars ngu nna shagrau da ma ai.

           Dai hpang Jinghpaw Mungdan Shanglawt Hpyen Dap ( KIA ) ngu ai hpe mung bai hpaw la sai. Jinghpaw Mungdan shanglawt hpyendap hpe 1961 ning February praw (5) ya shani hpaw hpang dat ai re. Dai nhtoi kaw nna ya dai ni du hkra February praw 5 ya shani hpe Rawt Malan Nhtoi ngu masat let shagrau sha-a ai lam galaw nga saga ai.

    Ndai ( KIA ) wuhpung hpe GOC. Lahtaw Zau Seng ( Shawngdaw de Kayin rawt malan 1st Brigrade Dap ba Up) ningbaw nna woi awn ai re. Kanau ni rai nga ai Lahtaw Zau Tu, Lahtaw Zau Dan hte Pungshwi Zau Seng, Lama La Ring, Slg.Jaw Bung ni ningnan daw hta ndai wuhpung hpe lata tut woi awn lai wa ai ni rai nga ai.

References: 

Kachin Times Volume 1. Page 35.

Jinghpaw mung masa lam yan ni, Page 59.

Duwa Bawmwang La Raw


Download Link: